برنامج إحالة الخبير • الشروط الرسمية
شروط برنامج الإحالة
كل اللي لازم تعرفه عن دعوة الخبراء، ربح أيام اشتراك مجانية، والقواعد اللي بتحمي البرنامج.
آخر تحديث: أيلول 2026
الخلاصة بـ30 ثانية
جيب خبير، خد شهر.
إذا حدا انضمّ من خلال كودك، سجّل كخبير، فعّل اشتراك مدفوع، وتمّت الموافقة عالإحالة، بتاخد 30 يوم اشتراك مجاني. فيك تربح لحدّ 3 مكافآت خلال الحملة، يعني 90 يوم كحد أقصى. الإحالات الوهمية، الحسابات المكرّرة، والدفعات الملغاة أو المسترجعة ما بتنحسب.
اشتراك مدفوع فعلي
14 يوم للتأكد من الدفعة
مراجعة وموافقة يدوية
الحد الأقصى: 3 مكافآت (90 يوم)
1
1. مين فيه يشارك بالبرنامج؟
- برنامج الإحالة قبل إطلاق الخبير متاح لكل شخص مسجّل في قائمة التسجيل للوصول المبكر (لائحة الانتظار) الرسمية.
- يعني سواء كنت زبون، خبير، أو مسجّل كزبون وخبير، فيك تحصل على كود إحالة وتشارك فيه.
- لازم يكون عمر المشارك 18 سنة أو أكتر ويكون عنده الأهلية القانونية المطلوبة بلبنان.
- موظفي الخبير ومقدّمي الخدمات اللي بيشتغلوا مباشرة مع المنصة فيهم يشاركوا الروابط ويساعدوا بالدعوات، بس ما بيحقّلن يحصلوا على مكافآت الاشتراك المجاني ضمن هالحملة.
2
2. كيف منعرف مين دعا مين؟
- الإحالة بتنحفظ تلقائياً لما شخص جديد ينضمّ من خلال رابط الإحالة الخاص فيك أو يستخدم كودك وقت التسجيل.
- كل شخص فيه يكون مربوط بجهة إحالة وحدة بس. إذا كان في إحالة مسجّلة من قبل على رقم التليفون، الإحالة الأولى هي اللي بتنعتمد وما فينا نبدّلها بإحالة جديدة بعدين.
- لازم كود أو رابط الإحالة يكون موجود وقت التسجيل للوصول المبكر. ما فينا نضيف إحالة بأثر رجعي لشخص كان مسجّل من قبل من دون كود.
- بيانات التتبع المرتبطة برابط الإحالة ممكن تنتهي بعد 30 يوم من فتح الرابط أو فور إتمام التسجيل، أي وحدة بتصير قبل.
3
3. إمتى الإحالة بتصير مؤهلة للمكافأة؟
- الإحالة ما بتصير مؤهلة للمكافأة إلا إذا تحققت كل الشروط التالية:
- الشخص المدعو لازم يسجّل كخبير مهني على منصة الخبير ضمن أحد المجالات المعتمدة.
- لازم يكمّل ملفه، ويعمل التحقق المطلوب، وينقبل كخبير موثّق على المنصة.
- لازم يشتري ويفعّل اشتراك خبير مدفوع فعلياً عند إطلاق الخدمة.
- مجرد التسجيل للوصول المبكر، فتح حساب مجاني، الاستفادة من عرض المؤسسين، هدايا الإطلاق، الفترات المجانية، أو اشتراك حاصل عليه من مكافأة إحالة سابقة ما بيعتبر اشتراك مدفوع مؤهل للمكافأة.
4
4. قديش المكافأة وكيف بتنضاف؟
- عن كل إحالة مؤهلة ومعتمدة، الداعي بياخد 30 يوم اشتراك مجاني.
- المكافأة بتنضاف حسب نوع حساب الداعي: إذا زبون بياخد 30 يوم اشتراك زبون، إذا خبير بياخد 30 يوم اشتراك خبير، وإذا حسابه زبون وخبير بتنطبق المكافأة على الاشتراك المناسب لحسابه.
- إذا عند الداعي اشتراك فعّال وقت الموافقة، بتنضاف الـ30 يوم فوق تاريخ انتهاء اشتراكه الحالي.
- إذا ما عنده اشتراك فعّال، الـ30 يوم بيبلشوا فوراً من وقت موافقة الإدارة عالمكافأة.
- مكافآت الإحالة ما إلها قيمة نقدية، وما فيك تسحبها كاش، تبيعها، تحوّلها لشخص تاني، أو تبدّلها بمبلغ مالي.
5
5. التأكد من الدفعة والموافقة
- بعد ما الخبير المدعو يفعّل اشتراكه المدفوع، بتدخل الإحالة بفترة تحقق مدتها 14 يوم.
- إذا الدفعة انلغت، انردّت، صار عليها اعتراض أو Chargeback، أو تبيّن إنها غير صالحة خلال هالفترة، الإحالة ما بتاخد مكافأة.
- ما في أي مكافأة بتنضاف أوتوماتيكياً. كل إحالة مؤهلة لازم تنراجع وتنعتمد يدوياً من فريق الخبير المخوّل بالموافقة.
- إذا تبيّن بعد الموافقة إن الدفعة الأصلية انردّت أو انلغت، بيحق للخبير يلغي أو يسترجع أيام الاشتراك اللي انمنحت بسبب هالإحالة.
6
6. قديش فيك تربح؟
- خلال حملة ما قبل الإطلاق، كل شخص فيه يحصل على حد أقصى 3 مكافآت إحالة، يعني مجموع 90 يوم اشتراك مجاني.
- إذا جبت إحالات ناجحة أكتر من 3، منضل نسجّلها باسمك ضمن سجل الإحالات والإحصاءات، بس ما بتعطيك أيام اشتراك إضافية ضمن هالحملة.
- كل خبير مدعو فيو يعطي مكافأة إحالة وحدة بس. تغيير رقم، فتح حساب جديد، إغلاق الحساب وفتحه من جديد، أو تجديد الاشتراك ما بيخلق إحالة جديدة.
- ما فيك تستخدم أيام الاشتراك المجانية بطريقة هدفها تعمل سلسلة إحالات مصطنعة أو تدوير مكافآت بين مجموعة حسابات.
7
7. الإحالات الوهمية والتلاعب ممنوعين
- ما فيك تحيل حالك، لا برقم تليفون تاني، ولا بإيميل تاني، ولا بحساب إضافي إلك أو لشخص عم تستخدم حسابه لمصلحتك.
- ممنوع إنشاء إحالات وهمية، شراء إحالات، الاتفاق مع أشخاص لتفعيل اشتراكات بس بهدف الحصول على المكافآت، أو أي محاولة للتلاعب بالنظام.
- ممنوع استخدام سبام، بوتات، رسائل جماعية مزعجة، أو أي طريقة مضللة لنشر روابط الإحالة.
- إذا تبيّن وجود غش أو تلاعب، بيحق للخبير يلغي الإحالات، يوقف المكافآت، ويلغي أو يسترجع أي أيام اشتراك انمنحت نتيجة هالتصرفات.
8
8. قديش بتضل الحملة شغّالة؟
- الإحالات الجديدة ضمن هالحملة فينا نسجّلها بس طالما برنامج إحالة ما قبل الإطلاق والتسجيل للوصول المبكر بعدهم مفتوحين.
- وقت نسكّر التسجيل للوصول المبكر، ما منعود نقبل إحالات جديدة ضمن هالحملة.
- بس أي إحالة تسجّلت قبل إغلاق الحملة بتضل محفوظة، وبتكمّل مسارها بعد الإطلاق من تسجيل وتحقق واشتراك مدفوع ومراجعة ومكافأة إذا استوفت الشروط.
9
9. تعديل أو إيقاف البرنامج
- الخبير بيحتفظ بحق تعديل شروط البرنامج، إيقافه مؤقتاً، أو إنهائه بالنسبة للإحالات الجديدة.
- إذا صار أي تغيير مهم، مننشره عهالصفحة ومنحدّث تاريخ آخر تعديل.
- أي إحالة كانت مؤهلة ومعتمدة حسب الشروط السارية وقتها ما بتتأثر بتغييرات مستقبلية.
10
10. القرار النهائي والاستفسارات
- فريق الخبير هو المرجع النهائي للتحقق من صحة الإحالات، الدفعات، أهلية المكافآت، وأي محاولة تلاعب بالبرنامج.
- قرارات الموافقة أو الرفض بتنأخذ حسب هالشروط والمعلومات المتوفرة عند فريق الخبير وقت المراجعة.
- إذا عندك أي سؤال عن الإحالات أو المكافآت، فيك تتواصل معنا عبر واتساب الخبير أو الإيميل الرسمي.
عندك سؤال عن برنامج الإحالة؟
فريق الخبير جاهز يساعدك عالواتساب بأي سؤال عن الإحالات، شروطها، وكيف بتنحسب أيام الاشتراك المجانية.